أوتار الجيتار- كيف تختار الأوتار المناسبة للجيتار الكلاسيك و الأكوستيك؟

الأوتار الموجودة على جيتارك الكلاسيك او الأكوستيك عليها عامل كبير جداً في الصوت اللي بيصدره الجيتار. لو دخلت اي محل بيبيع أوتار جيتار حتحتار جداً لأن هناك إختيارات كتيييرة جداً وانت مش عارف اي واحد منهم حيكون مناسب للجيتار بتاعك! في المقال ده حبيت اني أوضح التفاصيل الدقيقة اللي تخص أوتار الجيتار وازاي تختار اوتار الجيتار الملائمة لجيتارك و الستايل اللي بتعزفه. كمّل قراءة اذا كنت عايز تعرف ازاي تختار أوتار الجيتار الصحيحة للجيتار الكلاسيك او الأكوستيك.

أوتار الجيتار الأكوستيك

الجيتار الأكوستيك ما فيهوش بيك أبز او أمبلفاير عشان يضخم الصوت، لذلك الأوتار حيكون عليها عامل كبير في الصوت اللي طالع من الجيتار، وكذلك العوامل اللي حتختار عليها الأوتار ومنها جسم الجيتار الأكوستيك نفسه.

الأكوستيك vs الكلاسيك جيتار

طبعاً الفرق الكبير في الصوت، الجيتار الكلاسيك اوتاره نايلون وبيتعزف بيه الكلاسيك و الفلامنكو. أما الجيتار الأكوستيك أوتاره ستيل (معدن) وبيتعزف بيه روك ، بوب ، كانتري ، وبلوز. في كل الأحوال أوتار اي جيتار فيهم ما ينفعش تركب على الجيتار التاني، أبداً!! يعني ما ينفعش تركب أوتار كلاسيك على الأكوستيك، والعكس صحيح برضه، ما ينفعش تركب أوتار أكوستيك على كلاسيك جيتار. تركيبة رقبة الجيتار الكلاسيك و التوب بتاع البودي ما يستحملوش الشد Tension بتاع أوتار الأكوستيك. لو عملت كده حيكون فيه إحتمال انك تتلف البريدج (المكان اللي بيركب فيه الأوتار).

معايير أوتار الأكوستيك

قبل ما نذكر الصفات الرئيسية والأنواع المختلفة لأوتار الكلاسيك والأكوستيك جيتار، حنتكلم الأول عن معايير الأوتار حيث انها تنطبق على النوعيين. اوتار الجيتار بيتم صنعها بتخانات (سُمك) مختلف او تقدر تقول معايير مختلفة. التخانات بتكون عبارة عن 1 على ألف من البوصة. أقل سمك وتر بيكون 0.010 وأتخن وتر بيكون 0.059 . المعايير دي ليها أثر كبير على الصوت اللي طالع من الجيتار و إمكانية العزف عليه.

حتى أوتار الجيتار الكلاسيك بتكون محددة عن طريق الشد بتاعها Tension، وحنتكلم عنها بعد شوية. لكن بالعموم دي المعايير المختلفة للأوتار الأكوستيك:

معايير الأوتار الخفيفة Light Tension

• بتكون سهلة في العزف
• تكنيك البيند pending بيكون أسهل
• بتتقطع بسهولة
• صوتها منخفض والنوتة بيروح صوتها بسرعة
• ممكن يصدر صوت باز Buzzing من الفريتس خصوصاً لو الجيتار الأكشن بتاعه منخفض
• الشد بتاعها منخفض على رقبة الجيتار لذلك بينصح بيها للجيتارات القديمة جداً

معايير الأوتار الثقيلة Heavy Tension

• صعبة في العزف
• محتاج تضغط عليها أكثر عشان تصدر صوت، والبيند بيكون مش سهل فيها
• صوتها أعلى بكثير و النوتة بتستمر وقت أطول
• بتحمل جهد او شد كتير على رقبة الجيتار

معايير أوتار الجيتار الأكوستيك والإلكتريك بالأرقام

المعايير ممكن تختلف من شركة لأخرى حسب المصنع، لكن بالعموم دي معايير وتخانات الأوتار للجيتار الأكوستيك والإلكتريك:

• “extra light”: .010 .014 .023 .030 .039 .047
• “custom light”: .011 .015 .023 .032 .042 .052
• “light”: .012 .016 .025 .032 .042 .054
• “medium”: .013 .017 .026 .035 .045 .056
• “heavy”: .014 .018 .027 .039 .049 .059

أختار على أساس إيه؟

في إختيارك للأوتار حاول انك تراعى العوامل اللي حقولها دلوقتي:

حجم جسم الجيتار Body Style

قاعدة مهمة: لو جسم الجيتار صغير استخدم اوتار خفيفة، لو كبير استخدم أوتار ثقيلة.

ستايل عزفك Playing Style

لو بتعزف فينجر ستايل Finger-Style فالأفضل انك تختار أوتار خفيفة لسهولة العزف. لو كل عزفك سترمينج Strumming كوردات وأغاني فالأفضل انك تركب أوتار ثقيلة ، مع انها مش حتكون سهلة لو انت مبتدئ. طيب لو بتعزف الإثنين؟ يبقى تركب الوسط الخفيف Light Medium . دي بتجمع ما بين الإثنين ، أوتار البيز بتكون ثقيلة (عشان السترمينج)، وأوتار التريبل بتكون خفيفة (عشان الفينجر ستايل).

الصوت المطلوب Desired Tone

أكيد دلوقتي بقيت عارف ان الأوتار الثقيلة صوتها أعلى خصوصاً في اوتار البيز عشان الكوردات و نوتات البيز، أما الأوتار الخفيفة فالصوت حيكون أفضل في أوتار التريبل عشان السولوهات و الفينجر ستايل.

عمر الجيتار وحالته Guitar age and condition

الجيتارات القديمة بتكون حالتها هشة ، فمن الممكن لو ركبت عليها أوتار ثقيلة ان رقبة الجيتار يحصلها شيفت من مكانها او تتقوس ، وممكن البريدج يطلع من الجيتار. لو مش متأكد من حالة الجيتار بتاعك ، او هل الأوتار الثقيلة مناسبة ليه او لأ ، حاول انك تستشير حد فاهم او بيصلح جيتارات.

المواد المستخدمة في صنع أوتار الجيتار الأكوستيك

فيما يلي الخصائص الأكوستيكة لأنواع أوتار الجيتار الأكثر شيوعاً:

برونز Bronze: صوتها واضح وعالي ولها رنين قوي، مشكلتها انها بتتلف بسرعة عشان البرونز بيتأكسد.

برونز فوسفوري Phosphoric Bronze: صوتها مثل البرونز لكن دافئ أكثر والفوسفور بيطول العمر الإفتراضي لها.

برونز ألمنيوم Aluminium Bronze: صوت الأوتار قوي جداً في البيز و التريبل وتعتبر أفضل من البرونز الفوسفوري.

نحاس Brass: صوتها ميتاليك عن باقي الأوتار.

بوليمر مغلفة Polymer-coated : صوتها مش قوي و رنان مثل باقي الأوتار الغير مغلفة، لكن بتعيش أكثر ومضادة للصدأ.

حرير و حديد Silk and Steel: أوتار حديد مغلفة بطبقة من الحرير او النايلون و النحاس. صوتها ناعم و التون اللي بتصدره أرق من باقي الأوتار، وتعتبر الأوتار المفضلة لعازفين الفولك و الفينجر ستايل.

أوتار الكلاسيك جيتار (نايلون)

أوتار الكلاسيك بيتعزف بيها الكلاسيك، الفلامنكو، والبوسانوفا وخلافه. الأوتار دي صوتها رقيق ونغمتها دافئة و كل عازفين الجيتار أستخدموها في الأغاني الحزينة سواء كانت أغاني جاز او كانتري او حتى روك.

دائماً بيُنصح انك تستخدم كلاسيك جيتار لو انت مبتدئ والسبب ان أوتاره النايلون بتكون خفيفة على الأصابع في البداية. دي قاعدة عامة، لكن عموماً بعد فترة قصيرة من التدريب أطراف الأصابع بتنشف وبيتكون عليها نوع من النسيج بيخليها تكون قوية، والإحتكاك الناتج عن الأوتار ما بتشعرش بيه بعد فترة (بتتراوح حسب انت بتتمرن قد إيه).

أوتار الجيتار الكلاسيك خصوصاً لو كانت لسة جديدة بتحتاج يتعملها تيونينج بإستمرار بعكس أوتار الأكوستيك. بالإضافة انها بتتأثر بالحرارة والرطوبة أكثر من أي نوع أوتار جيتار أخرى.

معايير أوتار الكلاسيك

المعايير اللي حنذكرها دلوقتي هي بالعموم لكن للأسف بتختلف من براند لآخر ، فلازم حضرتك حتجرب لحد ما تستريح على نوع معين. الخصائص الأكوستيكة لأوتار النايلون هي كالتالي:

أوتار الجيتار ذات التردد المنخفض Low Tension

• سهل العزف عليها خصوصاً لو أكشن الجيتار عالي
• صوتها منخفض و ضعيف
• لا تصلح لعزف الفلامنكو لأنه محتاج صوت قوي و رنان
• تصلح لعزف الليجاتو الناعم
• إحتمالية الزن Buzz كبيرة

أوتار الجيتار ذات التردد العادي Normal Tension

خير الأمور الوسط ، خصائصها بتكون وسط بين أوتار التردد المنخفض و التردد العالي.

أوتار الجيتار ذات التردد العالي High Tension

• صعوبة العزف عليها خصوصاً لو الأكشن عالي
• صوتها عالي وقوي
• تصلح لعزف الفلامنكو و السترمينج
• بتعمل مشاكل في البريدج و رقبة الجيتار خصوصاً لو الجيتار قديم او ضعيف

بعض المصانع بتعمل حاجة لطيفة جداً وهي انها بتعمل أوتار البيز ذات تردد عالي ، وبتعمل أوتار التريبل ذات تردد عادي عشان يحصل توازن في الصوت (طبعاً الأوتار دي بتكون غالية في السعر).

أفضل طريقة لإختيار أوتار الجيتار

أول حاجة لازم تستقر على براند او نوع معين من الأوتار ، وبعدين تستقر على خامة الأوتار ( برونز – فوسفور – مطلي ألومنيوم..الخ) . فيه أنواع كثيرة موجودة مثل سافارز SAVAREZ، او دي أداريو D’Addario ، او أي نوع آخر لكن بالعموم دول أفضل نوعين في السوق. بعد ما تقرر أي براند حتستقر عليه جرب طقم من كل تردد (منخفض-عادي-عالي) وإعزف عليه وشوف الأحسن لصوابعك و ذوقك وأذنك.

مش معنى ان حد نصحك انك تشتري النوع ده يبقى خلاص ده أحسن نوع، ستايل عزفك و ذوقك ممكن يكون مختلف عن البائع او صديقك اللي نصحك.

موضوع التردد في أوتار الجيتار الكلاسيك بيثير جدل دائم بين عازفي الجيتار، وللأسف مفيش قاعدة واحدة تمشي على الكل، لازم تجرب بنفسك اي نوع/تردد ملائم لجيتارك وعزفك.

المواد المستخدمة في صنع أوتار الجيتار الكلاسيك

فيما يلي الخصائص الأكوستيكة لأنواع أوتار الجيتار الكلاسيك الأكثر شيوعاً:

• نايلون شفاف Clear Nylon: الأكثر شيوعاً، معروفة بصوتها الواضح و الغني.
• النايلون المعالج Rectified Nylon: أيضاً مصنوعة من النايلون الشفاف لكنها معالجة لتعطى نفس القطر على طول الوتر. صوتها أنعم من النايلون الشفاف.
• النايلون الأسود Black Nylon: مصنوعة من مواد نايلون مختلفة. بتعطى صوت دافئ و عميق خصوصاً في أوتار التريبل وتعد شائعة في الجيتار الفلامنكو.
• تايتنيوم Titanium: صوتها متألق أكثر من أوتار النايلون كما ان ملمسها أنعم.

المواد المستخدمة في صنع أوتار الجيتار الكلاسيك (البيز) Bass Strings

أوتار الجيتار البيز بتكون نايلون و مغلفة بطبقة من مادة معدنية معينة. من أشهر تلك المواد:

برونز 80/20: بتكون 80% نحاس و 20% زنك، وأحياناً بيطلق عليها براس Brass. هذه الأوتار بتمتاز بصوتها العالي جداً لدرجة ان بعض المصانع بتتطلق عليها جولد Gold.

نحاس مطلي بالفضة Silver-Plated Copper : التغليف الفضي بيضفى نعومة على ملمس الأوتار، اما النحاس بيجعل صوتها دافئ Warm. بعض المصانع بيطلقوا عليها سيلفر Silver.

علامات انه حان الوقت لتغيير أوتار الجيتار

• تيونينج (ضبط) أوتار الجيتار أصبح صعب.
• بدأت تظهر علامات صدى.
• أوتار الجيتار قشّرت وبدأ يظهر ما بداخلها.
• تون الصوت بقى فلات او ميت.
• مش فاكر آخر مرة غيرتهم امتى!

أغير أوتار الجيتار كل قد إيه؟

لا يوجد إجابة واحدة للسؤال ده. لكن هناك عوامل بتقصّر عمر أوتار الجيتار منها:

• إيدك بتعرق كتير وانت بتعزف.
• بتعزف بعنف على الأوتار.
• بتتمرن كتير.
• بتغيّر التوينينج بإستمرار (فيه تيونينج مختلفة للجيتار).
• بتدخن او بتعزف في مكان فيه سجاير كتير.

نصائح لتطويل عمر أوتار الجيتار

• إمسح الأوتار بقماشة جافة وناعمة بعد كل تمرين.
• إغسل ايدك قبل كل تمرين عشان تقلل أكسدة الأوتار.
• إشتري آلة لف الأوتار String Winder، مش غالية وبتوفر وقت كبير في تركيب أوتار الجيتار.
• سجل تاريخ تغييرك لأوتار الجيتار في نوتة او على علبة الأوتار.
• إحتفظ بطقم أوتار إحتياطي في شنطة الجيتار، وكام وتر E (أول وتر) عشان بيتقطع بسرعة.