أول ما مسكت جيتار سنة 1992 ماكنش فيه انترنت ولا يوتيوب ولا مكان أتعلم فيه جيتار، وبالتالي الطريق لتعلم العزف على الجيتار ماكنش واضح. دلوقتي الوضع اختلف او بالأصح إتعكس، أصبح فيه ألاف الفيديوهات والمواقع اللي تعلمك تعزف جيتار بس معظمهم لا يتبع اسلوب واضح او منهج في التعليم.

أضف الى ذلك انك مش عارف عايز تتعلم ايه في الأول، يعني فيه كلاسيك وأكوستيك وإلكتريك وكل واحد منهم ليه منهج مختلف في التعلم، وتكنيكات مختلفة في اليد اليمين والشمال. دايما بقول إبدأ بالكلاسيك جيتار عشان أسباب كتيرة، منها:

سهل انك تشتري كلاسيك جيتار ومش حيكلفك كتير زي الإلكتريك

أوتاره سهلة وناعمة على اليد في الأول

حتتعلم أسماء النوتات والفريتس على الجيتار وده حيفيدك في أي ستايل انت عايز تعزفه

آخر نقطة دي مهمة جداً، لأني بشوف طلبة كتير بتعزف كويس لكن مش عارفة أسماء النوتات او الفريتس على الجيتار، ممكن تقول ان ده مش مهم ، المهم اني أكون بعزف وخلاص لكن صدقني، حتيجي في نقطة وتقف ومش حتعرف تكمل، لأنك دايماً حتكون معتمد على المعلومات اللي انت عارفها، وفيه حاجات كتير انت مش عارفها مش حتعرف تتعلمها.

مثال: أنت قررت تلعب أكوستيك جيتار، فلازم تعرف ازاي تعمل Strumming للكوردات ، او الكلمة العربي بتاعتها مع اني مش بحب أستعملها خالص هي (العفق) على الأوتار! كل أغنية بيبقى ليها طريقة في السترمينج ، فيه أغاني ممكن تلعبها بنفس الطريقة وحتطلع حلوة ، لكن بعد فترة وبعد ما عزفت 10 أغاني او أكتر، لازم تتعلم سترمينج مختلفة، وأحسن طريقة انك تتعلم ده انك تكون عارف الإيقاعات المختلفة في النوتة عشان تلعب الأرتام (الإيقاعات) بطريقة صحيحة والتوقيت (التايمينج) بتاعك يكون مضبوط.

فلو انت مش عارف ازاي تقرا الإيقاعات المختلفة ومتمرن عليها كويس، حتكتفي باللي انت عارفه ومش حتتقدم في عزفك. وفيه ناس كتيير قوي قابلتها وقفت عند أغنية Hotel California ومش عارف يعمل ايه بعد كده، جاب آخره ومش قادر يتعلم كوردات جديدة او أرتام متقدمة.

طيب إيه الحل؟

الحل بسيط ، لو انت مبتدأ تماماً إتعلم كلاسيك جيتارعشان تعرف تقرأ الإيقاعات المختلفة وإيدك تمشي شوية في الجيتار، وبعدين بعد فترة ممكن شهرين او ثلاثة تختار اذا كنت عايز تكمل او تتعلم أكوستيك او إلكتريك. ولو إنت بقالك فترة بتعزف ونفسك تتقدم وتلعب حاجات متقدمة، إتعلم تقرأ الايقاعات المختلفة او ممكن لو عندك وقت تتعلم كلاسيك جيتار وتطبق ده في الأكوستيك جيتار، بس ده محتاج وقت وإنضباط عالي ومش حينجح مع كل الناس.

الفرق بين طريق الكلاسيك وطريق الأكوستيك جيتار

عشان أختصر عليك الطريق، حلخص الطريقتين وشوف أي واحدة تنفعك او عايز تتعلمها وإبدأ بيها:

ده بإختصار الفرق بين الطريقين، طريق الكلاسيك جيتار وطريق الأكوستيك او الإلكتريك جيتار. في حاجات مشتركة بينهم وفي حاجات غير مشتركة، المهم انت عايز ايه.

فيه مدرسين جيتار ومعاهد بتفرض على الطالب انه يتعلم كلاسيك جيتار في الأول عشان دي الطريقة الصحيحة، وطبعاً المدرس لا يذكر اي سبب مقنع من الأسباب اللي ذكرتها عشان يقنع بيه الطالب، فتكون النتيجة ان الطالب بيفقد حماسه وبيحس ان الجيتار حاجة صعبة ومملة. إزاي حتتمرن على حاجة انت حاسس انها مملة ومش حتوصلك للطريق اللي انت عايزه؟

عايز أعزف ألحان وأغاني عربية

خلينا نكون متفقين على حاجة ، ان الجيتار آلة غربية في الأصل فكل الكوردات والسلالم والهارموني بتاع الآلة نفسها بيخدم الألحان الغربية أكثر. على سبيل المثال لا الحصر، الأغاني العربية القديمة زي ام كلثوم وعبد الوهاب وفريد كان أغلب ألحانهم على العود ، لأن العود فيه ربع تون وده مش موجود في الجيتار، اللي موجود في الجيتار هو النص تون ومضاعفاته. حتى لما أم كلثوم دخل في فرقتها عمر خورشيد وعزف اللحن على الجيتار، كان بيعزف مقدمة اللحن والباقي كان بيبقى في الخلفية ومش سامع صوت الجيتار.

أنا لا أقلل من قدر عمر خورشيد وموهبته ، لكن بالمقارنة بين الجيتار في دوره كآلة بين ام كلثوم والبيتلز او فرق الروك ، الجيتار عامل أساسي وأكثر الفرق فيها جيتارين او ثلاثة. فلو انت مزاجك الألحان العربي الأصيلة أنصحك انك تعزف عود مش جيتار، لكن لو عايز تعزف أغاني عمرو دياب مثلاً او تامر حسني او محمد منير، في الحالة دي ممكن طبعاً ، لكن خلي بالك لازم حتغني مع الجيتار لأن الكوردات لوحدها بتبقى مصاحبة للغناء. اما الكلاسيك جيتار عشان تعزف أغنية لعمرو دياب ، فطبعاً حيكون أفضل عشان عمرو دياب بيعتمد كتير على الجيتار الكلاسيك في مقدمات أغنياته ، وباقي الأغنية بتكون سامع الجيتار سواء كوردات في الخلفية او السولو.

الخلاصة

أنا حاولت في المقالة دي اني أسلط الضوء على الطريق اللي حتسلكه لتعلم العزف على الجيتار، لأن لما أبتديت ماكنش فيه حد يقولي الكلام ده وأنا عرفته بعد سنوات من العزف والتدريس ، فحبيت أني أختصر عليك إحباطات كتيرة وطريق طويل عشان تعرف تمشي في أي طريق من الأول فتوصل أسرع بكتير، أرجو اني أكون أفدتك وتكون دلوقتي عرفت حتسلك أي طريق لتعلم العزف على الجيتار، هذا وبالله التوفيق.