تعلم الجيتار للمبتدئين – أشهر 50 سؤال وإجاباتهم

تعلم الجيتار للمبتدئين – وأكثر 50 سؤال شيوعاً وإجاباتهم

من خلال تعلمي و تدريسي للجيتار في السنوات الماضية، اتسألت أسئلة كتير جداً عن تعلم الجيتار للمبتدئين. طبعاً كان فيه منها اسئلة وجيهة وأسئلة تانية مستفزة خصوصاً من اللي خايف يعزف، او عايز يجرّب ومش ناوي يكمل.

في المقال ده حبيت اني أشاركك الأسئلة دي عشان لو فيه سؤال منهم عندك تعرف اجابته، وممكن يكون ده سبب انك تبدأ تعزف جيتار او يخليك تكمل رحلة العزف على الجيتار وانت حاسس انك مش لوحدك اللي بتواجه هذه المشكلة.

أنا قسّمت الأسئلة لمجموعات عشان أسهّل عليك انك تلاقي الإجابة، فهيا نتعرف على أشهر الأسئلة عن تعلم الجيتار للمبتدئين.

تعلم الجيتار للمبتدئين

1- أسئلة عن دروس الجيتار


1.1 أنا بدور على دروس اونلاين، الاقيها فين؟
ممكن تلاقيها على اليوتيوب او يودمي Udemy او هنا على الموقع فيه دروس باللغة العربية.

2.1 هوة أنا لازم آخد دروس مع مدرس جيتار؟
يفضّل جداً خصوصاً في الأول عشان تاخد الموضوع على مهلك وماتكتسبش عادات سيئة. لكن لازم تكون مع مدرس كويس يفهم انت عايز ايه بالضبط، عشان فيه مدرسين كتير حيضيعوا وقتك وفلوسك.

3.1 بكام درس الجيتار؟
فيه ناس اعرفها بتدي درس بأقل من 5$ في الساعة، وفيه ناس تانية بتدي 40$ في الساعة. مش شرط ان الرخيص يكون سيئ والغالي يكون ممتاز، ممكن يحصل العكس.

4.1 أزاي الاقي مدرس جيتار شاطر؟
معظم مدرسين الجيتار الشاطرين ما بيعملوش دعاية لنفسهم، بيعتمدوا على الدعاية الشفهية. ممكن تسأل محل الأدوات الموسيقية اللي اشتريت منه الجيتار عن مدرس كويس، عادة بيكونوا عارفين مدرسين شاطرين او ممكن يكونوا همة نفسهم بيدرسوا في المحل. وممكن تدور على جوجل لو كتبت (مدرس جيتار + منطقتك).

5.1 عايز أتعلم جيتار بالعربي عشان ضعيف في اللغة الانجليزية؟
يبقى لقيت الموقع الصحيح عشان هنا كل الكتب و الدروس باللغة العربية.


تعلم الجيتار للمبتدئين

2- أسئلة عن تعلم الجيتار للمبتدئين


1.2 لازم أتعلم قراءة النوتة الموسيقية؟
يفضّل لكن مش بالضرورة. فيه مقال انا كاتبه شارح الموضوع بالتفصيل، اضغط هنا لقراءته.

2.2 أتعلم كلاسيك والا أكوستيك في الأول؟
دايماً انا بفضل انك تبدأ بالكلاسيك جيتار عشان اوتاره ناعمة ومش حتتعبك في البداية، لكن فيه ناس اشترت اكوستيك وبدأت بيه. صحيح عانوا شوية عشان الأوتار معدن لكن اتعودوا عليها وكملوا عادي.

3.2 ينفع أبدأ بالإلكتريك جيتار من البداية؟
ينفع طبعاً. لكن خد بالك انك حتشتري جيتار و أمبلفاير فحتزيد التكلفة. لو انت مش متأكد من انك حتكمل اشتري كلاسيك او أكوستيك أفضل. لو معاك فلوس كتير ومش فارقة ، خلاص ابدأ بالإلكتريك جيتار.

4.2 إيه الفرق بين الكوردات العادية، والباور كوردز، والبار كوردز؟
الكوردات العادية بنسميها كوردات مفتوحة Open Chords عشان بيكون فيها أوتار مش ممسوكة بصوابعنا، ومعظم اغاني البوب بتتعزف بالكوردات دي وبتكون مكونة من 4 او 5 او 6 نوتات (او أوتار).
الباور كوردز بتكون عادة نوتتين او 3 بالكتير، من غير اوتار مفتوحة وبنعزف بيها أغاني الروك.
البار كوردز عبارة عن كوردات متقدمة بنكون ماسكين 5 او 6 اوتار بإصبع واحد عشان نعرف نحرك الكورد عبر الفينجربورد او رقبة الجيتار، وده بيتيح لنا عزف العديد من الكوردات بنفس شكل اليد مع تغيير مكان الكورد.

5.2 أنا مبتدئ تماماً وعايز أتعلم، أبدأ منين؟
ممكن تبدأ هنا على الموقع حتلاقي طريقة الشرح سهلة و خطوة بخطوة، وفيه دروس للكلاسيك و الأكوستيك والنظريات الموسيقية.
لو اللغة عندك مش مشكلة فأنا أرشحلك الكورس ده عشان فيه كل حاجة فعلاً، وساعدني كتير في البداية ولسة بدرّس منه. لن تحتاج اي كورس تاني لمدة سنة على الأقل. وأحلى حاجة فيه انه معاه الفيديوهات بتاعته وكل الملفات الصوتية وكتاب كامل فيه التمرينات كلها:


Gibson’s Learn & Master Guitar

6.2 حاخد وقت أد ايه عشان أعزف أول أغنية؟
كلنا مختلفين عن بعض، فيه ناس عزفت اغنية بعد شهر، وفيه ناس تانية خدت وقت أطول. بلاش تخلي موضوع الوقت يعملك إحباط، حاول تستمتع بالموضوع وصدقني لو عملت كده، حتعزف أغاني في أقصر وقت. وبرضه انا عملت مقال بالتفصيل عن الموضوع ده، اضغط هنا لقراءته.

7.2 أنا أشول، ينفع أتعلم؟
لو ما عندكش علم، بول ماكرتني و جيمي هيندركس همة الإثنين أيسرين (او أعسر)، المهم بيستخدموا إيدهم اليسار. فيه جيتارات مصنوعة مخصوص للحالة دي، او ممكن تغير ترتيب الأوتار ويبقى المشكلة اتحلت. من الآخر ينفع تعزف مفيش اي مشاكل.

8.2 أنا عايز أعزف روك بس، ليه لازم أتعلم الحاجات التانية؟
تعلم الجيتار عبارة عن مهارات كتير مع بعض، لو اتعلمت سلالم مثلاً حتعرف تعزف سولوهات الروك، وهكذا.

9.2 التابز TABS عبارة عن ايه؟
عبارة عن 6 خطوط بتمثل الستة أوتار بتاعة الجيتار، وعليها أرقام بتقولك تضغط فين او أماكن الفريتس على كل وتر. وفيه تابز متقدمة دمجت الأرقام مع أيقاعات النوتة الموسيقية عشان تعرف تعزف اللحن و الإيقاع.

10.2 لازم أتعلم سلالم Scales؟
انت مش حينفع تعزف اي آلة موسيقية من غير ما تتعلم سلالم. عمرك شفت دراجة من غير بدّال؟!

11.2 لازم أكون عارف أسماء الفريتس على الجيتار؟
طبعاً. لكن ده مش معنى انك تمسك الجيتار وتحفظ الفريتس كلهم في اسبوع! لو عندك منهج او مدرس كويس ، حفظ الفريتبورد حييجي بالتدريج.
وعموماً فيه طرق كتير لحفظها وانت مش محتاج تحفظ غير الوتر السادس و الخامس في البداية لحد فريت رقم 5 مثلاً.

12.2 هل ممكن أعزف جيتار من غير ما أتعلم نظريات موسيقية؟
طبعاً ممكن. لكن لازم يكون عندك أساسيات النظريات الموسيقية لو عايز تخرج من دائرة المبتدئين، او عايز تكتب أغاني، او عايز تدرّس جيتار. زي بالضبط اللغة العربية، كلنا بنتكلمها لكن مش عارفين قواعد النحو، لكن لو عايز تكون كاتب لازم تتعلمها.

13.2 أزاي أتعلم النقل بين الكوردات؟
لازم الأول تحفظ الكورد كشكل وتتمرن عليه لحد ما تعزفه بشكل صحيح. وبعدين ابدأ بعزف أغاني بسيطة من 3 الى 4 كوردات بالكتير، وبمجرد انك حفظت ازاي تنقل بينهم ابدأ اتمرن على كوردات ثانية وأعزف أغاني أصعب شوية.

14.2 عايز أطلّع الأغاني سماعي، ازاي؟
دي طريقة من أحد طرق التعلم وتكاد تكون أصعبها، لأنك في البداية انت لسة مش عارف حاجة. الطريقتين التانيين همة انك تقرا من النوتة او التابز، او عن طريق فيديو/ مدرس يقولك تعمل ايه.
عزف الأغاني سماعي محتاج تمرين من نوع آخر وفهم للنظريات الموسيقية. كتير بيحاولوا يعملوا كدة بطريقة المحاولة والخطأ وده بياخد وقت طويل. دي مهارة لازم تتعلمها بالتدريج من البداية لكن الأفضل انك تسثمر الوقت في التمرين على أساسيات العزف.

15.2 لازم أشتري جيتار عشان أبدأ أتعلم؟
نعم، لازم.


3- أسئلة عن الجيتار نفسه


1.3 هل الجيتار صعب؟
أي حاجة بتكون صعبة في الأول قبل ما تبقى سهلة. طبعاً حيكون فيه تحديات لكن المكافأة هي انك حتعزف آلة موسيقية كتير من الناس نفسهم يعزفوها وخايفين.

2.3 أي نوع أفضل للمبتدئين؟
النوع اللي يناسب ميزانيتك ده أولاً. ثانياً مش لازم تبدأ بحاجة غالية جداً ، ابدأ بحاجة معقولة نوعاً ما – مش رخيصة لأن صوتها سيئ وحتتعبك في العزف – وبعدين قرر اذا كنت حتشتري جيتار غالي فيما بعد.
لكن هناك انواع معينة مثلاً الكلاسيك أفضل جيتار للمبتدئين ياماها C40 ، وكورت AC100. بالنسبة للأكوستيك ممكن فيندر. راجع مقال أفضل جيتارات كلاسيك للمبتدئين، وأفضل جيتارات أكوستيك للمبتدئين.

3.3 هل فيه حاجة تانية أشتريها مع الجيتار؟
فيه ملحقات ممكن تسهّل عليك عملية التعلم زي ستاند للموسيقى ، تيونر، فوت ستول، حقيبة للجيتار لو انت حتاخد دروس. المقال ده فيه جميع الملحقات الأساسية و الثانوية.

4.3 ضبط الأوتار Tuning بتاع الجيتار دايماً مش مضبوط؟
ده عادي، درجة الحرارة بتأثر في الأوتار سواء بتشدهم زيادة، او بترخيهم. لازم تضبط الأوتار كل مرة حتتمرن، ومع الوقت الضبط مش حياخد منك اكتر من دقيقة واحدة.

5.3 إيه أكتر أوتار مناسبة للجيتار؟
ده موضوع يطول شرحه. فيه مقال شارح بالتفصيل كل ما يخص الأوتار.

6.3 أعمل إيه لما وتر يتقطع؟
أشتري طقم أوتار جديد وغيّر الأوتار كلها، غالباً بقالها أكثر من 6 شهور.

7.3 الجيتار بتاعي فيه زنّة، أعمل إيه؟
روح لحد متخصص في تصليح الجيتارت زي عادل صقر في المعادي، وممكن الزنة دي منك انت.

8.3 أغيّر الأوتار كل قد أيه؟
المفروض كل 50 ساعة عزف او 3 شهور ايهما الأول. لكن فيه أنواع غالية ممكن تعزف بيها 6 شهور او أكثر.

9.3 ينفع أركّب أوتار كلاسيك على الأكوستيك، او العكس؟
لأ، ما ينفعش وأرجوك بلاش تعمل كدة لأنك ممكن تدمّر الجيتار. كل جيتار ليه الأوتار بتاعته والبريدج الخاص بيه، أوتار الأكوستيك آخرها فيه دائرة بلاستيكية مناسبة للبريدج بتاعه، مش حينفع تركبها على الكلاسيك جيتار.
عايز تعزف اكوستيك اشتري اكوستيك جيتار، عايز تعزف كلاسيك اشتري كلاسيك جيتار.


تعلم الجيتار للمبتدئين

4- أسئلة عن التمرين على الجيتار


1.4 أنا معنديش غير 20 دقيقة في اليوم عشان أتمرن، مستوايا حيتحسّن؟
لو حتتمرن 20 دقيقة كل يوم يبقى ممكن اقولك ان مستواك حيتحسّن بشكل كبير خلال 3 شهور. لو قدرت تخليها 30 دقيقة يكون أفضل. حاول تلاقي وقت عشان تستثمر فيه تمرينك و عزفك للأغاني، وصدقني النتيجة حتكون مفاجأة بالنسبة لك.
أما لو مافيش غير 20 دقيقة في الأسبوع للجيتار، فيؤسفني أقولك ان ده مش حيوصلك لحاجة.

2.4 إزاي أحمّس نفسي للتمرين؟
لو انت لسة مبتدئ، اكتب قائمة بأكتر 10 أغاني نفسك تعزفها وحاول تشتغل على كوردات وتمارين توصلك لعزفهم. بالطريقة دي حتكون عارف انت بتتمرن ليه وايه الهدف منه، مش مجرد تمرين و خلاص.
اما لو كنت بتعزف بقالك فترة فتغيير ستايل عزفك حيخليك متحمس تاني، يعني لو بتعزف كلاسيك ممكن تغيّر وتعزف بلوز مثلاً او روك. بالشكل ده فانت حتتعلم حاجة جديدة والصوت حيكون جديد عليك، وده من شأنه انه يحمسك للتمرين.

3.4 إيه أفضل وقت للتمرين؟
الوقت اللي انت فيه غير مرهق. بلاش تمرين الجيتار يكون آخر حاجة في اليوم وانت في غاية الإرهاق، لأن تمرين الجيتار محتاج تركيز. حاول تخلي التمرين صباحاً وانت لسة نشيط، او بعد العشاء مباشرة، كلنا مختلفين في مواعيدنا فصعب اني أقولك أفضل وقت بالنسبة لك، لكن الأفضل انك تخليه روتين يومي بعد حاجة معينة انت بتعملها في اليوم.

4.4 أزاي أستفيد من وقت التمرين؟
بلاش تركز على حاجات كتير، قسّم وقت التمرين بحيث انك تتمرن على تكنيك معين (سلالم-اربيجيو-ليجادو)، وتراجع على مقطوعات سابقة عشان ما تنسهاش، وبعدين تتمرن على مقطوعة جديدة.
لو عملت كل واحدة 10 دقائق كدة انت اتمرنت 30 دقيقة. ومع الوقت ممكن تزود لحد ما توصل لساعة كاملة.

5.4 المفروض أتمرّن قد إيه في اليوم؟
تعلم الجيتار للمبتدئين ممكن يبدأ ب20 دقيقة كل يوم، ده أقل شيء عشان تشوف نتيجة بعد شهور قليلة. بالنسبة لمعظم الناس فممكن 30 – 45 دقيقة يومياً. اما لو عازف محترف ساعة او اكثر كل يوم.


تعلم الجيتار للمبتدئين
CAPO

5- أسئلة متنوعة عن تعلم الجيتار للمبتدئين


1.5 الكابو CAPO عبارة عن ايه؟ هل محتاج اشتريها؟
الكابو (الصورة اللي فوق) عبارة عن اداة بنركبها على الجيتار عشان ترفع طبقة الصوت نص تون لكل فريت. يعني لو حطيتها على الفريت رقم 2 كده انت رفعت الصوت تون كامل. دي بتحتاجها لو حتغني مع الجيتار عشان تناسب طبقة صوتك، او حتعزف في باند. معظم اللي بيعزفوا جيتار عندهم كابو.

2.5 اعزف بالريشة والا بأصابعي؟
الأفضل تتعلم الإثنين. لو حتعزف كوردات يبقى لازم تتعلم بالريشة (pick)، عشان صوت الكوردات بيكون أفضل. بالنسبة للصوابع حتى لو حتعزف الكتريك فحيكون فيه مقاطع موسيقية بتستخدم الفينجرستايل Finger-style، ففي الحالة دي حتعزف بصوابعك.

3.5 إيه أفضل نوع ريشة Pick للجيتار؟
فيه 3 أنواع للريشة ، خفيفة و متوسطة و هارد. الأفضل انك تستخدم الوسط (medium) عشان بتكون مناسبة لعزف الكوردات والسولوهات.

4.5 الأفضل اني أستخدم تيونر عشان أضبط الأوتار، والا بإذني؟
طبعاً استخدم تيونر، عشان أدق وأسرع. استخدام الأذن لضبط الأوتار مضيعة لوقتك خصوصاً لو عندك 20 دقيقة للتمرين!

5.5 لازم أقص ضوافري عشان أعزف جيتار؟
لازم ضوافر اليد اليسري تكون قصيرة جداً عشان تعرف تمسك الكوردات كويس، وما يحصلش صوت زن. أما اليد اليمنى فممكن تسيب الأضافر طويلة لو حتعزف كلاسيك او فينجرستايل.

6.5 أنا يدي صغيرة (او كبيرة) لعزف الجيتار، أعمل ايه؟
بلاش عمليات تجميل! الجيتار مش محتاج ان يكون عندك مقاس يد معين. لكن فيه حل، لو يدك صغيرة فعلاً، فيه مقاس جيتار ثلاثة أربع 3/4 للأطفال سن 8 سنين، ممكن ده يناسبك. او لو يدك كبيرة فهذه ميزة عشان تمسك الكوردات.
ملحوظة: ديفيد جيلمور عازف فريق بينك فلويد يده كبيرة جداً!

7.5 أطراف أصابعي بتألمني من التمرين، مفيش جوانتي ممكن ألبسه؟
للأسف مفيش. طبيعي ان أطراف الأصابع حتألمك في البداية عشان مش متعودة انها تضغط على أوتار حتى لو نايلون. لكن بعد فترة قصيرة 3 أسابيع من التمرين اليومي، مش حتلاحظ الألم ده. بلاش تضغط على إيدك في البداية، عشان كده بننصح ب20 دقيقة في الأول.

8.5 إيه أكثر أخطاء بيقع فيها المبتدئين؟
أنهم بيسمعوا كلام ناس ما بتعزفش جيتار، وللأسف كلامهم بيأثر فيهم وبعد فترة بيتوقفوا عن العزف. تعلم الجيتار للمبتدئين بياخد وقت وصبر كأنك بتتعلم لغة جديدة، بلاش تسمع لناس مش فاهمة وبتحاول تحبطك.
ودائماً تذكر انك لست وحدك اللي بيواجه مشاكل في العزف، كل المبتدئين عانوا من نفس المشاكل لكن تغلبوا عليها واصبحوا عازفين جيتار.

9.5 مش عارف أربّي أظافري عشان أعزف كلاسيك جيتار؟
ده أمر طبيعي خصوصاً بالنسبة للرجال. ضع قليل من زيت الزيتون على أضافرك وارتدي جوانتي على يدك قبل النوم. كرر الموضوع لمدة اسبوع وستنمو أظافرك بسرعة.

10.5 إزاي أحافظ على الجيتار بتاعي؟
بلاش تعرضه لدرجات حرارة عالية جداً، مثلاً تتركه في حقيبة السيارة باستمرار، او رطوبة عالية. اذا خلصت تمرين فضعه في الحقيبة المخصصة له. اشتري حامل جيتار وضعه عليه اذا كنت تتمرن باستمرار، وكذلك لتجنب وقوعه وكسره.

11.5 أكثر حاجة بتنصح بيها لشخص نفسه يتعلم جيتار؟
– أبدأ فوراً وبلاش تردد.
– الوقت بيجري بسرعة وفجأة حتلاقي سنة او أكثر عدّت وانت لسة ماخدتش القرار.
– بلاش تنتظر انك تجيب احسن جيتار في السوق، أشتري جيتار مناسب لميزانيتك وخصص 20 دقيقة من وقتك (ده فاصل إعلاني في مسلسل رمضان) عشان تتمرن.
– بلاش تسمع لناس مش فاهمة في الجيتار او ماعزفتش آلة موسيقية قبل كدة.
– أصبر أول سنة فقط عشان كل حاجة بتسمعها حتكون جديدة عليك.


6- أسئلة عن إختبارات الجيتار


1.6 لازم أدخل من المستوى الأول؟
لأ مش شرط، لو بتعزف بقالك فترة ممكن تدخل المستوى الثاني او الثالث او حتى الثامن. لو عايز ممكن تيجي وتعزف مقطوعة او اثنين قدامي وانا أحدد مستواك بالضبط.

2.6 ما هي المدارس اللي ممكن أمتحن فيها؟
فيه 3 مدارس موجودة في مصر حالياً، المدرسة الملكية البريطانية للموسيقى ABRSM، و كلية لندن للموسيقى London College of Music، و كلية ترينيتي Trinity College.
وحالياً تم إضافة مدرسة روك سكول Rock School في مصر، وانا ممثل عنها.

3.6 ينفع أدخل امتحان إلكتريك جيتار والا لازم كلاسيك؟
بالنسبة للكلاسيك جيتار فممكن تدخل كل المدارس ما عدا روك سكول.
بالنسبة للأكوستيك والإلكتريك جيتار ممكن تدخل روك سكول او ترينيتي.

4.6 إيه فايدة اني أدخل إختبار في أي مدرسة من السابق ذكرهم؟
الفايدة انك ممكن تبني مستقبلك وتشتغل بالشهادة اللي حتاخدها منهم لأنهم من أقدم المدارس و الكليات المتخصصة في الموسيقى. حتى لو مش حتشتغل بالشهادة حتعرف مستواك فين بالضبط ، وحتدرس على منهج مصمم من أحسن عازفين في العالم سواء كلاسيك او اكوستيك او روك.
حاجة مهمة كمان، ان في المستويات المتقدمة من المستوى 6 الى 8 في حاجة اسمها يوكاس بوينتس UCAS POINTS، دي لو انت لسة بتدرس في ثانوي ممكن تديلك أفضلية لما تقدم في جامعة زي الجامعة الأمريكية في القاهرة، او الجامعة الألمانية، او الجامعة الكندية.

5.6 الإختبار بيكون عبارة عن إيه؟
عادة بيكون 3 مقطوعات انت متمرن عليهم كويس جداً، وبعض السلالم والأربيجيو بتعزفهم، ومقطوعة دراسية بيقيسوا بيها التكنيك بتاعك، واختبار قراءة نوتة موسيقية (او إرتجال Improvising) وأسئلة شفوية عن المقطوعات اللي عزفتها.


هل لديك سؤال غير موجود في القائمة؟ برجاء كتابته وسوف أضيفه الى القائمة حتى تصل الى 100 سؤال عن تعلم الجيتار للمبتدئين، هذا وبالله التوفيق.

اترك تعليقاً