تعلم العزف على الجيتار الأكوستيك او الألكتريك

السلام عليكم، مش كل الناس بتحب الجيتار الكلاسيك او الموسيقى بتاعته، فيه ناس كتيرة نفسها تعرف طريقة تعلم العزف على الجيتار الأكوستيك او الإلكتريك. أنا شرحت في مقال قبل كده في المقال (الطريق الى تعلم العزف على  الجيتار)  الفرق بين طريقة تعلم الجيتار الكلاسيك والجيتار الأكوستيك، في المقال ده حنتناول طريقة تعلم الجيتار الأكوستيك او الألكتريك وأحسن منهج موجود حالياً عشان يعلمك العزف على الجيتار الأكوستيك او الإلكتريك.

تعلم العزف على الجيتار الأكوستيك – المنهج

فيه كتب كتيرة لتعلم الجيتار عموماً، لكن انت محتاج كتاب مركز من الأول على انك حتلعب جيتار أكوستيك او الكتريك. معظم الكتب اللي شفتها او اللي عندي حاجة من الإثنين: إما مركز على الجيتار الكلاسيكي وقراءة النوتات، او مركز على الألكتريك على أساس انك بتعرف تعزف جيتار وعندك الأساسيات وعايز تلعب ألكتريك دلوقتي.

والطريقتين دول فيهم عيوب: أولاً انك حتضيع وقت في الأول وممكن تزهق لحد ما توصل لآخر الكتاب اللي فيه قسم الإلكتريك جيتار. أو انك ممكن تكون لسة مبتدئ والكتاب بيتعامل معاك على انك فاهم نظريات الموسيقى والكوردات، فبالتالي حتصاب بإحباط لانك مش فاهم حاجة!

الحل؟

أخيراً لقيت الكتاب اللي ممكن فعلأ تبدأ بيه لو انت مبتدئ تماماً ، وواخدك واحدة واحدة وبيفهمك كل حاجة عن الأكوستيك والألكتريك جيتار.

الكتاب ده اسمه Hal Leonard Guitar Tab Method Book 1 ، ودي صورة الكتاب:

طبعاً الكتاب بالإنجليزي و احنا هنا هدفنا طريقة تعلم العزف على الجيتار باللغة العربية، فأنا ان شاء الله حترجم الكتاب كله بالعربي ما عدا أسماء الأغاني.

الكتاب مش كبير حوالي 35 صفحة، لكن فيه أكتر من 100 تمرين وأغنية كفيلين انهم يخلوك تعزف أكوستيك او إلكتريك جيتار، مش كلاسيك. وبصراحة الناس بذلوا فيه مجهود كبير عشان يحطوا كم المعلومات دي في كتاب صغير و سهل، وكل تمرين بتطلع منه بحاجة مفيدة زي تكنيك عزف، او تمرين للأصابع ، او فهمت إيقاع جديد.

الفكرة كلها انك تعزف التمرينات الموجودة كلها في الكتاب، ايوة كلها. معظم التمرينات عبارة عن مازورة (بار) او اثنين، وبتتعلم فيها الرف Riff بتاع الأغنية. الرف عبارة عن التيمة الرئيسية او اللحن الأساسي للأغنية. وده ممكن يكون في مقدمة الأغنية، او في الكورس (الجزء اللي بيتكرر كتير في الأغنية).

كمان الكتاب بييجي معاه CD فيه كل التمرينات المكتوبة عشان تسمعها ، وكمان فيه Backing tracks عشان تلعب معاها، زي فرقة بتعزف معاك وانت الجيتار الأساسي في الفرقة.

ولو انت طالب نجيب وخلصت الكتاب الأول، فيه الجزء الثاني والثالث. وكمان كل جزء فيه كتاب مكمل ليه اسمه Hal Leonard Guitar Tab Method Songbook ، ده فيه 10 أغاني كاملة بالتابز بتاعتهم، مستواهم حسب الكتاب اللي انت بتتعلم منه، يعني مثلاً لو انت في الكتاب الأول وخلصته، حتعرف تعزف كل الأغاني اللي في الكتاب بتاع الأغاني الجزء الأول، ولو انت بتتعلم في الكتاب الثاني وخلصته، حتعرف تعزف كل الأغاني اللي في كتاب بتاع الأغاني الجزء الثاني، وهكذا.

نوع الجيتار المطلوب

مطلوب انه يكون عندك جيتار أكوستيك او ألكتريك (معاه أمبلفاير) عشان تتعلم ، الجيتار الكلاسيك للأسف مش حينفع عشان طبيعة الأوتار بتاعته مش حتساعدك. أنا عارف اني قلت قبل كده ان الجيتار الكلاسيك أحسن حاجة تبدأ بيها، بس انت عايز تعزف أكوستيك او الكتريك عشان تلعب روك ، بلوز، او تتعلم كوردات، ففي الحالة دي الجيتار الكلاسيك مش حينفعك.

ملحوظة: لو عندك كلاسيك جيتار بس ممكن تبدأ بيه عادي لحد ما تجيب اكوستيك او الكتريك، بس الصوت حيكون مختلف عشان الأوتار.

الريشة PICK

حتحتاج ريشة او بيك عشان تلعب الكورس ده، مش حنلعب زي الكلاسيك بالأصابع. إشتري 5 بيك عشان لو اشتريت واحدة بس حتضيع! ونوعها يكون وسط Medium بلاش السوفت او الهارد عشان دول مش بيطلعوا صوت حلو ، والهارد ممكن تقطع الأوتار!

بس، وربنا يسهل وأخلص ترجمة الكتاب بسرعة عشان نبدأ.

هذا وبالله التوفيق.