تعلم العزف على الجيتار الكلاسيك للمبتدئين 

“تعلم العزف على الجيتار الكلاسيك للمبتدئين “

رحلة تعلم العزف على الجيتار غالباً بتبدأ مع الجيتار الكلاسيكي ، وبعدها ممكن يغير لجيتار أكوستيك او إلكتريك، وأحياناً كتيرة بيكمل مع الجيتار الكلاسيكي لأنه عجبه صوته او بقى يعزف عليه كويس جداً ومش عايز يغير. تعلم العزف على الجيتار الكلاسيك بيتطلب حاجتين:

• إنك تشتري جيتار كلاسيكي.
• إنك تتعلم قراءة النوتة الموسيقية.

وفي المقال ده حنتكلم عن النقطتين بإستفاضة.

“تعلم العزف على الجيتار الكلاسيك”

أحياناً اسمه كلاسيك جيتار ، او سبانيش جيتار وده بيبقى ليه مواصفات معينة عشان لما تروح تشتري جيتار تبقى عارف شكله عامل ازاي.

أول حاجة بتميز الجيتار الكلاسيكي الجزء العلوي اللي بنضبط منه الأوتار واسمه الهيد Head اللي موجود فيه 6 مفاتيح لضبط الأوتار. وشكله عامل كده:

لاحظ ان الهيد فيها فتحات مش مقفولة ، الجيتار الأكوستيك الهيد بتبقى مقفولة زي كده:

الحاجة التانية اللي بتميز الجيتار الكلاسيكي هو أوتاره. الأوتار نايلون مش معدن (ستيل)، الأكوستيك جيتار هو الأوتار بتاعته بتبقى ستيل، وطبعا الإلكتريك جيتار.

حتى طريقة ربط الأوتار بتبقى مختلفة في الإثنين، الكلاسيك جيتار الأوتار بتتربط باليد وبيكون شكلها كده:

أما الجيتار الأكوستيك فبيكون فيه زي دبابيس او Pegs عشان تمسك الأوتار، وبيكون شكلها كده:

لو عايز تسمع الفرق بين الجيتار الكلاسيك والأكوستيك، الفيديو ده حيوضحلك الفرق:

كلام جميل، أشتري أي جيتار؟

حسب ميزانيتك، فيه جيتارات بخمسين دولار وفيه جيتارات بألفين دولار، وفيه أكتر من كده بكتير. لو انت مبتدئ مش لازم تشتري جيتار رخيص قوي ولا غالي قوي. الجيتارات الكويسة بتبقي في حدود 150- 250 دولار ، ممكن تحولها لعملتك عشان تعرف كام.

أنت مش محتاج أكتر من كده في الأول لأنك لسة مبتدئ وكمان عشان تاخد القرار بسهولة ، وماتحسش انك بترمي فلوسك في الهوا.

طبعاً في أنواع معروفة ومتميزة بجودتها زي الياماها ، الفندر، كورت، وأغلى واحد فيهم ألاهامبرا عشان مصنوع في أسبانيا.

مش عايز أخش في تفاصيل الفرق بينهم عشان مش حتفرق معاك كتير، المهم انك تختار جيتار سعره مناسب ليك وأهم حاجة يكون عاجبك شكله ولونه.

وأول حاجة تعملها بعد ما تشتريه تطلب من البائع انه يغير الأوتار بتاعته! ليه ؟ عشان في معظم الوقت بيكونوا حاطين أوتار أي كلام رخيصة عشان ما ينفعش يبيع الجيتار فاضي، فبيركبوا أوتار وحشة جداً منظر مش أكتر.

خليه يشيل الأوتار القديمة ويركب أوتار جديدة كويسة ، بتبقى في حدود 20$ بس صدقني حتفرق معاك في الصوت و حتعيش أكتر.

الفوت ستول Foot Stool

إشتريت الجيتار والأوتار؟ مبروك. ناقص حاجة كمان صغيرة قوي بس لابد منها وهي الفوت ستول Foot Stool وده شكله:

ده بيعمل ايه؟ ده عشان تحط عليه رجلك اليسار وتحط الجيتار عليها. مهمته انه يرفع رجلك اليسار شوية عن الرجل اليمين فمسكة الجيتار تبقى مضبوطة، زي الشكل ده:

لازم القعدة دي؟ أيوة لازم، مش عايز تتعلم كلاسيك جيتار؟ أفتح اليوتيوب وأتفرج على اي عازف جيتار كلاسيكي محترف – مش بيعزف في غرفته، بيعزف على مسرح- حتلاقيه حاطط رجله اليسار على الفوت ستول.

دي من أساسيات العزف على الكلاسيك جيتار، ان لازم الجيتار يبقى الهيد بتاعته – المفتوحة – على نفس مستوى عينك، ده بيخلي الجيتار :

• قريب منك

• ثابت جداً في مكانه

• إيدك اليسار بتتحرك في حرية تامة من اول الجيتار لآخره

• بيرغمك انك تعزف بأطراف صوابعك

• يعطي مساحة من الحرية للأصابع، يعني ممكن تعمل Stretch أكتر ليها

كل ده بيعمله الفوت ستول عشان وضع الجيتار بالشكل ده يستحيل من غير فوت ستول. خلي بالك، القعدة وطريقة مسكة الجيتار في غاية الأهمية ، الطريقة الكاجوال او التقليدية مش حتنفع مع الكلاسيك جيتار خصوصاً في الأول، عشان الجيتار بيبقى بيتحرك كتير ومش ثابت في مكانه، و انت مش شايف إيدك بتعمل ايه، او بإختصار عكس النقط اللي فاتت ده كلها!

تعلم العزف على الجيتار الكلاسيك بيبدأ من قعدتك بالجيتار، مش عايز تقعد بالشكل ده او حاسس ان شكلك حيبقى غريب، استحمل في الأول وبعدين حتتعود عليه ومش حتعرف تتمرن غير وانت قاعد كده. كلنا حسينا ان الوضع ده غريب في الأول، وطبعاً كان في تعليقات سخيفة من أصحابنا، بس أول ما تبدأ تعزف كل الكلام ده بيتنسي وبيركزوا مع العزف مش مع قعدتك.

“قراءة النوتة الموسيقية”

إتكلمت قبل كدة عن قراءة النوتة في المقال ده (طريقة تعلم الجيتار) وقلت انك لو قررت تتعلم جيتار كلاسيك لازم تقرأ النوتة الموسيقية. لازم يعني؟ نعم لازم ، لأسباب كثيرة.

أولاً: الجيتار الكلاسيكي لازم تتعلمه وحدة وحدة عشان فيه تكنيكات صعبة ، وأحسن طريقة عشان تتعلم ببطئ هية انك تتعلم النوتة .

ثانياً: النوتة الموسيقية بتتعامل مع أجزاء من العدة الواحدة، بمعنى انك بتعزف عدة واحدة او نص او ربع او ثلاث أرباع او واحد ونص، كل دي كسور من العدة الواحدة الصحيحة. وطبعاً محتاج انك تتعلمهم وتتمرن عليهم عشان تتعلم الكلاسيك جيتار صح.

ثالثاُ: الجيتار الكلاسيكي او الموسيقى بتاعته مبنية على نظريات موسيقية، فلو انت درست النظريات دي حتسهل عليك كتيير انك تلعب المقطوعات المكتوبة للجيتار. وعشان تدرس النظريات لازم تكون بتعرف تقرأ نوتة.

رابعاً: لو بقيت تعزف بشكل إحترافي او  متقدم جداً في الكلاسيك جيتار، حتيجي في منطقة معينة وتقف لو انت مابتعرفش تقرأ نوتة موسيقية، لأن المستويات المتقدمة في العزف صعب انك تلاقي المقطوعات موجودة بالتابز TABS، فحتبقى متضطر انك تتعلم تقرأ نوتة ، وحيبقى صعب عليك بعد ما عرفت تعزف بقالك سنين انك تبدأ من الصفر تاني!

خامساً: لو بقيت تعزف مع آلات تانية ، كل الآلات الموسيقى بتاعتها مكتوبة بالنوتة الموسيقية، الجيتار بس اللي فيه تابز، فبالتالي وانت في البروفات مع بقية الموسيقيين حتحس انك تايه لأنهم بيتكلموا في مصطلحات موسيقية انت مش عارفها، من الآخر كده مفيش موسيقار ما بيعرفش يقرأ نوتة او على الأقل عنده المبادئ الأساسية بتاعتها.

سادساً: كتير من الموسيقيين او العازفين بيغيروا الكارير او شغلهم وبيشتغلوا ملحنين او موزعين موسيقى ، وبيعملوا موسيقى تصويرية لأفلام او تترات برامج. وكل برامج الكمبيوتر المتخصصة في الموسيقى والتوزيع معتمدة على ان المستخدم بيعرف يقرأ النوتة الموسيقية.

وفي أسباب كتيرة تانية، بس الخلاصة انك بتتعلم لغة جديدة حتفتحلك مجالات عديدة في المجال الموسيقي، ومفيش داعي انك تحرم نفسك منها عشان خايف تتعلم حاجة جديدة. النوتة الموسيقية لغة عالمية، لو كتبت مقطوعة او بتعزف لحن في مصر وسافرت بيه اليابان واديته لموسيقار هناك، حيعزفه زي ما انت عزفته في مصر!

“الخلاصة”

بدون شك ان التابز TABS أسهل بكتير من النوتة ، وكلنا عندنا عقدة من النوتة الموسيقية من أيام الدراسة. لكن انت النهاردة عايز تتعلم كلاسيك جيتار واخترت انك تبقى موسيقار، فالنوتة مش حتبقى مفروضة عليك زي الواجب بالعكس ده انت اللي عايز تتعلمها عشان حتخليك تعزف أحسن، زمان ماكنتش عارف انت بتاخدها ليه او ايه فايدتها، دلوقتي انت عرفت!

كل حاجة في الأول بتبقى صعبة قبل ما تبقى سهلة ، والوقت بيمر بسرعة فجأة حتلاقي سنتين عدّوا وانت لسة نفسك تتعلم جيتار، إبدأ النهاردة او الاسبوع ده وما تخليش اي حاجة تمنعك من انك تعمل حاجة انت نفسك فيها. وأنا هنا معاك عشان أساعدك في أي حاجة مش فاهمها. خلّي عندك ثقة في نفسك وإبدأ، هذا وبالله التوفيق.