” عشان أتعلم جيتار لازم أقرأ نوتة موسيقية؟”

السلام عليكم، كلنا فاكرين حصص الموسيقى في المدرسة وازاي بفضل الله كل المدرسين نجحوا انهم يكرهونا في حاجة اسمها النوتة الموسيقية. وبالتالي، لما نسمع كلمة نوتة موسيقية علطول بنفتكر مدرس الموسيقى في المدرسة و تافا تيفي تا تي! طريقة تعلم الجيتار مش لازم تكون بالنوتة في الأول، خصوصاً لو انت عديت سن المراهقة ودخلت في العشرينات او الثلاثينات.

في طرق كتيير نتعلم بيها الجيتار ، أكثرها قسوة هي ان في أول حصة أديلك نظريات الموسيقى وازاي تقرأ النوتة الموسيقية. معظم مدرسين الموسيقى خريجين معاهد وكليات موسيقى، وهية دي الطريقة اللي اتعلموا بيها. يعني ما يعرفوش طريقة غيرها أصلاً، وما اعتقدش انهم حاولوا يتعلموا طريقة تانية. فتبعاً لنظرية (كل إناء ينضح بما فيه) ، لما يبدأ معاك أول درس فلازم تاخد النوتة الموسيقية وهية دي طريقة تعلم الجيتار اللي يعرفها، فمعاه عذره.

“يعني في طريقة تعلم الجيتار من غير ما أقرأ نوتة؟!”

طبعاً! بس لازم الحق يتقال، النوتة هي لغة الموسيقى. أي آلة تانية زي البيانو، الكمانجة، العود، الناي، كلهم بيقروا نوتة موسيقية. فعشان تبقى موسيقار او حتعزف في الاوركسترا، او حتلعب مع موسيقيين آخرين، لازم تكون بتتكلم نفس اللغة اللي بيتكلموها وهي النوتة.

بالإضافة الى انها لغة الموسيقى، النوتة بتفتح كذا مجال ليك، يعني لو عايز تألف او تلحن او توزع موسيقى، كل ده محتاج ان حضرتك تبقى فاهم نظريات الموسيقى وبالتالي بتعرف تقرأ نوتة.

بالنسبة للجيتار، النوتة مطلوبة لو انت عايز تعزف كلاسيك جيتار او جاز، لأن الإثنين دول من غير ما تتعلم نوتة مش حتعرف تعزفهم، ومش لازم تعرف ليه دلوقتي.

طيب انت مش عايز اي حاجة من اللي فاتوا دول وعايز تتعلم جيتار بس، او عايز تلعب أكوستيك جيتار او تغني مع الجيتار، او تلعب روك او بلوز، ولما ربنا يسهل وتبقى بتعزف نبقى نتعلم نوتة براحتنا، ينفع؟ الإجابة نعم.

” قولي طريقة تعلم الجيتار من غير نوتة أرجوك”

حاضر، الطريقة هية حاجة اسمها تابز TABS. حضرتك حتتعلم تعزف بالأرقام، أرقام الخانات او الفريتس اللي على الجيتار. دي تعتبر أسهل طريقة تعلم الجيتار وممكن أخليك تعزف حاجات بسيطة بعد حصتين بس! لأنها بتعتمد على انك تلاقي رقم الفريت على الوتر وتعزف. لو مش فاهم حاجة دلوقتي، حتفهم بعد شوية.

طيب ايه الفرق بين التابز والنوتة؟ فرق كبير. في النوتة انت بتشوف الرمز او النوتة ، وعلى حسب شكلها ومكانها بتعرف هية ايه، وبعدين تلعبها على الجيتار. اما في التابز بيديلك مكان النوتة مباشرة على الجيتار، رقم الوتر ورقم الخانة، فإنت مش محتاج تفك الشفرة بتاعة النوتة ده هوة بيقولك تدوس فين مباشرة. وصلت؟

مثال عملي: دي نوتة جيتار، فاهم حاجة؟ طبعاً لأ، لوغاريتمات.

طيب دي نفسها بس تابز.

شايف أرقام وخطوط صح؟ الجيتار فيه 6 أوتار، وكل وتر عليه 19 خانة (او فريت). الخط اللي فوق ده أرفع وتر، والخط اللي تحت ده أتخن وتر(سميك). رقم 0 يعني الوتر مفتوح بنلعبه من غير ما نحط ايدينا على اي فريت، وكل الأرقام من 1 الى 19 بنحط ايدنا على رقم الفريت. يعني في الصورة حتعزف الوتر السادس (السميك) مفتوح 0، وبعدين فريت رقم 1، وهكذا.

بالطريقة دي انت بتشوف الخط والرقم و بتلعب الفريت المطلوبة وبتعزفها. شفت طريقة تعلم جيتار أسهل من كده؟!

بس فيه مشكلة! صحيح هوة قالك تعزف فين، بس فيه حاجة نسيها… الإيقاع! يعني زمن النوتة قد ايه. الموسيقى عبارة عن لحن وإيقاع. اللحن احنا عرفناه، حنعزف هنا. طيب والإيقاع؟ ولا تقلق، في حل. النوتة الموسيقية!!!!

ثانية واحدة! إيه اللي جاب دي تاني في الموضوع مش كنا خلصنا منها؟ أيوة، حنفضل نتعلم بالأرقام ما تخافش، بس حنضيف على الرقم أيقاع، يعني شكل عشان نعرف حنعزف الرقم او النوتة دي قد ايه. بإختصار إحنا حنستلف شكل الإيقاعات اللي في النوتة الموسيقية الأصلية ونحط الأشكال دي فوق الأرقام عشان نعزفها صح ويطلع اللحن مضبوط.

كل اللي مطلوب من حضرتك انك تحفظ 4 أشكال للأيقاع، ما افتكرش ان ده طلب صعب في مقابل انك تعزف جيتار، والا ايه؟

دي الأشكال اللي مطلوب تحفظها:

كل شكل منهم ليه زمن ، 4 عدات (جمع عدة)، عدتين ، عدة واحدة ، نصف عدة. يعني اول واحدة – من اليسار – لما نعزف نوتة حيبقى زمنها طويل (ممكن تستبدل عدة بكلمة ثواني)، يعني 4 ثواني. الثانية زمنها ثانيتين، الثالثة زمنها ثانية واحدة، الرابعة نصف ثانية. احنا بنتكلم على زمن فممكن نستعمل الثواني مؤقتاً.

لما ندمج الأرقام مع الإيقاع حنحصل على الشكل التالي:

كدة وصلنا لنتيجة مهمة جداً، ان احنا لسة حنتعلم بالأرقام لكن شكل الإيقاع اللي فوقيه حيخلينا نلعب الرقم او النوتة لفترة زمنية معروفة (4، 2، 1 او نصف ثانية). وبالتالي حيطلع اللحن مضبوط عشان عزفنا النوتة في زمنها الصحيح.

“الخلاصة”

طريقة تعلم الجيتار مش لازم تكون صعبة او مملة. أنا دايماً بسأل الطالب انت عايز تتعلم جيتار ليه؟ عايز تعزف إيه بالضبط؟ كلاسيك او روك او بوب. ما حدش قال لازم كل عازفين الجيتار يكونوا بيقرأوا نوتة. لو عايز يعزف كلاسيك جيتار ببدأ معاه بالنوتة، لو لقيتوا بعد كام حصة بدأ يزهق او ما عندوش نفس الحماس اللي في الأول، بغير طريقة تعلم الجيتار للتابز.

التابز حتخليك تعزف أغاني كاملة مش بس حاجات بسيطة، لأ في تابز كاملة لأغاني صعبة و معقدة كمان. زي ما النوتة فيها مستويات وعايزة تمرين، التابز كمان فيها مستويات ولازم تمرين عشان تعرف تعزفها.

أرجو أني أكون وضحت الفرق بين النوتة الموسيقية والتابز، وانك حسيت ان في طريقة تعلم الجيتار سهلة وبسيطة ومن غير نوتة. أنا حالياً بترجم منهج كامل لتعلم الجيتار عن طريق التابز، والكتاب مخصص لتعليم الجيتار الأكوستيك او الإلكتريك. فيه أكتر من 100 مثال وأغنية مكتوبين بالتابز بنفس الطريقة اللي شرحتها في المقال. وإن شاء الله لما أخلص الكتاب حتلاقوه موجود على الموقع ، ومعاه كمان الملفات الأكوستيكة عشان تسمع وتعزف في نفس الوقت.

لو عندك اي إستفسار او سؤال اكتبه في التعليقات وأنا حرد عليك في أسرع وقت أن شاء الله، هذا وبالله التوفيق.