منهج للجيتار – دليلك للبداية الصحيحة وتوفير الوقت

إختيار منهج للجيتار عليه عامل كبير جداً انك حتكمل تعليم او انك حتتوقف بعد فترة قصيرة من التعلم. مش عايز أبالغ وأقول ان أول شهرين بالتحديد من شراءك للجيتار وبداية التعلم تعتبر من أهم المراحل في رحلة العزف على الجيتار.

لأنه ببساطة في الفترة دي بتكون المعنويات مرتفعة جداً ، وكسرت حاجز الرهبة انك تبدأ وخلاص اشتريت جيتار جديد او مستعمل وعايز تتعلم.

في المقال ده حنتعرف على ازاي تختار منهج للجيتار مناسب لك من البداية عشان تكسب وقت، وتستغل الفترة الأولى وحماسك لسة مرتفع.

أزاي أختار منهج للجيتار؟

حدد نوع الموسيقى المفضل

أكيد انت اشتريت الجيتار عشان تعزف نوع معين من الموسيقى، سواء روك، جاز، بلوز، كانتري، ريجي، ميتال.. الخ.

طيب لو انت مش عارف اسم نوع الموسيقى المفضل؟ دي بسيطة، ممكن تعمل بحث على جوجل لإسم الفرقة او العازف المفضل ليك وتعرف هو بيعزف اي نوع موسيقى.

مثال: إريك كلابتون Eric Clapton مثلاً، عملت بحث على جوجل وكتبت : “Eric Clapton music genre”. فطلعت نتيجة البحث كالآتي:

منهج للجيتار

كدة انا عرفت ان الباشا بيعزف روك و بلوز.

طيب انا لسة مبتدئ ومش عارف انا عايز ايه بالضبط؟ في الحالة دي يبقى حضرتك مش حتفرق معاك وممكن تبدأ بأي منهج، لكن أنصحك تكمل قراءة المقال للآخر يمكن يفيدك.

اشتري جيتار يناسب نوع الموسيقى

لو اخترت البلوز او الروك ممكن حضرتك تبدأ بالأكوستيك جيتار او الإلكتريك جيتار. دول أفضل جيتارين ممكن تبدأ بيهم رحلتك في العزف على الجيتار.

أنواع الجيتار
best-beginner-guitar

انا طبعاً بفضل دايما انك تبدأ بالكلاسيك جيتار عشان اوتاره ناعمة وسعره غير مكلف في البداية. لكن مش بالضرورة، ممكن تبدأ بالنوع المناسب لفئة الموسيقى اللي انت عايز تعزفها.
ممكن تقرأ المقال ده “ الطريق الى تعلم العزف على الجيتار” وتعرف بالتفصيل الفرق بين كل نوع.

ده غير طبعاً انك لما تتمرن حتلاحظ ان الصوت اللي طالع من جيتارك مقارب جداً لصوت الأغنية الأصلي، وده في حد ذاته حيشجعك ان تكمل.

إختار منهج للجيتار مناسب لنوع الموسيقى

خلاص حددت نوع الموسيقى واشتريت الجيتار المناسب، الخطوة دي مهمة جداً وهية اللي احنا عايزين نعرفها، ابدأ بأي منهج للجيتار؟

عندك اختيارين في الأول:

الأول:حتتمرن مع مدرس جيتار

لو حتتمرن مع مدرس جيتار سواء في سنتر او خاص، يبقى لازم تقوله من الأول انا عايز أعزف كذا (روك – بلوز – ميتال – شرقي). لو هوة مدرس فاهم يبقى حيختارلك المنهج المناسب.
ملحوظة مهمة: معظم المدرسين للأسف مش مهتمين بالنقطة دي وحيدرسلك اللي هوة عارفه وخلاص. لو بعد ثالث او رابع حصة انت حسيت ان مش ده اللي انت عايزه، انصحك تغيّر المدرس او السنتر.

الثاني: حتتمرن لوحدك بدون مدرس

معظم الناس بتعمل كدة دلوقتي لتوفير الوقت و الفلوس وده مش عيب ومش غلط. أصبح دلوقتي فيه طرق كتيرة ممكن تتعلم بيها اونلاين لو لغتك الإنجليزية كويسة. اما لو عايز تتعلم بالعربي فأنت في الموقع الصحيح.

الطريقة دي مش صعبة لكن عايزة عزيمة قوية وإلتزام لأن مفيش حد حيقولك اتمرنت او لأ. انت صاحب القرار وممكن تتمرن كل يوم او يوم في الاسبوع.

لكن حنفترض انك حتتمرن بشكل معقول يعني 3 مرات في الاسبوع كل مرة 30 دقيقة – ده أقل حاجة عشان تشوف نتيجة بعد شهرين مثلاً. إختار أي منهج للجيتار؟

منهج للجيتار الكلاسيكي

لو حتعزف جيتار كلاسيكي او Spanish يبقى ممكن تبدأ هنا على الموقع لأني عامل أكثر من جزء حيساعدوك في البداية. ممكن تدخل على قناتي على اليوتيوب وتحمل الكتاب وتبدأ دلوقتي.

طبعاً فيه ناس أحسن مني بكتير ممكن تبدأ معاهم لو لغتك الإنجليزية كويسة، لكن بالنسبة للغة العربية فالمحتوى اللي انا بقدمه يعتبر جيد بالنسبة للمبتدئين. ليه؟

ببساطة عشان ماشي على منهج مدروس وبأهلّك انك تاخد إمتحان بشهادة معتمدة من كلية لندن للموسيقى، يعني فيه مايسترو من لندن حيقيّم عزفك ويديلك شهادة انك بتعرف تعزف جيتار.

منهج للجيتار الأكوستيك والإلكتريك

منهج للجيتار

اما لو قررت انك تعزف أكوستيك جيتار لأنك عايز تعزف أغاني لفرق وفنانين معروفين زي: إد شارين – بوب مارلي – بيتلز – ستينج – ميتاليكا – اريك كلابتون وغيرهم، فأنا بنصحك انك تجيب كتب روك سكول Rockschool لأنها صممت منهج أكوستيك متكامل من البداية حتى الإحتراف.

نظرة سريعة على المنهج من المستوى التمهيدي حتى المستوى الثامن (آخر مستوى) حتلاقي معظم الأغاني اللي كل الناس عايزة تعزفها على الجيتار:

منهج للجيتار

كل مستوى ليه كتاب منفصل، وكل كتاب بيحتوى على 6 مقطوعات بالنوتة الموسيقة والتابز. ممكن تعمل داونلود للملفات الصوتية مجاناً عن طريق الموقع بعد ما تشتري الكتاب.

وفي كل كتاب حتلاقي تمارين تكنيكية تساعدك على عزف كل الأغاني المطلوبة في المستوى ده، وكل الكوردات المفروض تتعلمها.

ده غير طبعاً ان كل أغنية متسجلة مرتين، مرة بوجود الجيتار عشان تسمع الأغنية تعزفها ازاي ، ومرة بدون الجيتار عشان انت تعزف مع التراك كأنك في فرقة.

نفس الموضوع طبعاً مع الجيتار الإلكتريك، كل حاجة مشروحة بالتفصيل في كاتلوج روك سكول، ممكن تحملّه عشان تعرف تفاصيل أكثر.

منهج للجيتار
Rockschool

كتالوج روك سكول

ده فيديو بيشرح ازاي بيختاروا الأغاني و بيصمموا منهج للجيتار على أي أساس:

الكتاب The Book

كل كتاب فيه 6 مقطوعات مختارة بعناية لتناسب المستوى اللي انت فيه. جميع الأغاني عصرية لفرق وفنانين معروفين حتى سنة 2019، فأكيد حتلاقي أغنية او أكثر تعرفها.

كل الأغاني مكتوبة بالنوتة الموسيقية و التابز عشان لو مش بتعرف تقرأ نوتة.

Acoustic Guitar Grade 5 Sample

تمارين و سلالم وكوردات لكل مستوى تؤهلك انك تعزف كل الأغاني الموجودة في الكتاب.

Chords
Technical Exercise

ملفات صوتية عالية الجودة تم تسجيلها في استديو Abbey Road في لندن من قبل موسيقيين محترفين، عشان تسمع الأغاني ازاي تتعزف وعشان تتمرن عليها بالمصاحبة.

الخلاصة

إختيار منهج للجيتار يعد بنفس أهمية إختيار الجيتار بتاعك بل ممكن أهم، لأن ده الوقت اللي انت حتقضيه بتتمرن على التمرينات و التكنيكات المختلفة اللي حتقربك من انك تعزف الموسيقى المفضلة لك.

لو عندك سؤال او تعليق برجاء كتابته في التعليقات و حقوم بالرد عليك.

اترك تعليقًا