“إيه أسهل طريقة لتعلم العزف على الجيتار؟”
الحقيقة أنا بتسأل السؤال ده كتير جداً خصوصاً من الآباء والأمهات اللي حاسين ان الموضوع صعب وحياخد حصص وفلوس كتيير، ويمكن ابنهم او بنتهم ما يعرفوش يعزفوا في الآخر برضه. أسهل طريقة لتعلم العزف على الجيتار انك تشتري جيتار وتاخد الموضوع جد، سهلة مش كده؟ بس التطبيق بتاعه صعب شوية لأننا بنتعامل مع الجيتار على إنه في الأول وفي الآخر جيتار، يعني هواية او لعبة مش مذاكرة او شغل.
إفتكر كده لما كنت عايز تتعلم أي حاجة، ولناخد على سبيل المثال لعبة فيفا FIFA! ما تستغربش، انا لعيب بلاي ستيشن قديم. أول مرة مسكت فيها الجويستيك ولعبت ماتش مع صحابك ، شيلت كام جول؟؟ حوالي 10 على الأقل، لسة مش عارف اي حاجة ، ولا التحكم ازاي ولا الترقيص ولا حتى الزرار اللي بيشوت! طيب، عملت ايه؟ كل يوم بعد الدرس تروح عند صاحبك وتلعبه على الأقل ساعتين اذا ماكنش 4 ساعات او أكتر، وبعد شهر بقيت حريف وما حدش عارف يغلبك.
الجيتار عامل كده بالضبط، يعني مش بالضبط قوي بس قريب جداً . في حاجة في جسمنا اسمها Muscle Memory يعني ذاكرة العضلات، دي اللي بتخليك تكتب تكست على الموبايل وانت سايق، وبتلبس وانت بتتفرج على التلفزيون، وطبعاً بتلعب فيفا وانت بتشرب شيشة!
الماسل ميموري دي ذاكرة في العضلات وفي الأصابع بتاعة الجسم ، كل ما تعمل حاجة عدد مرات كتييرة قوي ، العضلات بتعمل Save ليها بحيث انك تسترجعها بسرعة لما تعملها تاني. فلما حضرتك كنت بتلعب كل يوم ساعتين فيفا ، انت ضغطت على الزراير بتاعة الجويستيك حوالي 5000 مرة، وبالتالي مابقتش تفكر حتشوط او حتباصي ازاي ، خلاص الصوابع عارفة هية بتعمل ايه ورايحة فين ، وكمان السينس Sense بتاعك على الجويستيك وقوة الضربة وكل الحاجات اللي انت عارفها دي بقيت متمكن فيها، لأ وكمان You are having fun! يعني مش حاسس انك بتعمل حاجة صعبة خلاص.
شيل بقة الجويستيك وحط مكانه الجيتار، حتلاقي ان الموضوع واحد. المطلوب من حضرتك انك تمسك الجيتار طبعاً مش ساعتين في اليوم، ربع ساعة او نص ساعة كفاية قوي. وتتمرن على التمرينات اللي في الكتاب او المدرس عملها معاك ، حتى لو كانوا 3 تمارين بس. الفكرة كلها مش في عدد التمارين ، على قد ما هية في تكرار التمرين كذا مرة. ليه؟ عشان الماسل ميموري اللي اتكلمنا عنها تحفظ أماكن النوتات او الكوردات على الجيتار فتبقى سهلة ، ومش محتاجة مجهود منك انك تفتكرها او تنقل بينهم .
“بقالي شهرين بعمل كده وبرضه ما اتعلمتش حاجة!”
انت ممكن تكون بقالك شهرين ماسك الجيتار كل يوم نص ساعة ، بس بتتمرن غلط! أيوة، في كذا عامل مهم لازم تاخدهم في الحسبان وانت بتتمرن، مثلاً:
- مفيش منهج واضح قدامك ، فماسك الجيتار وقاعد بتعمل اي كلام وفاكر انك بتتمرن.
- لسة مبتدئ واخترت أغنية صعبة جداً وعايز تلعبها للجيرل فريند عشان تحسسها انك فنان ، فصوابعك وايدك ورجلك احمروا من الألم ، ولسة ما عملتش اول سطرين في الأغنية!
- الجيتار بتاعك مش مضبوط وكل اللي انت قاعد بتعمله مش سامع منه حاجة او حاسس انك بتعزف غلط.
- دخلت على اليوتيوب وشفت 300 ساعة فيديوهات بتعلم جيتار، وما عملتش اي حاجة منهم عشان مش فاهم حاجة.
- رحت لحد يعلمك جيتار، لكن للأسف هوة مش مهتم انك تتعلم حاجة ومحسسك انك محتاجله أكتر من الهوا اللي بتتنفسه عشان يفضل ياخد منك فلوس.
وحاجات كتير زي كده!
على فكرة ، أنا عديت بكل اللي فات ده في الأول – ماعدا اليوتيوب عشان ماكنش فيه نت أصلاً! فضلت 3 شهور بعزف تمرين واحد.. آه والله تمرين واحد مفيش غيره، هوة ده اللي انا عارفه على الجيتار. انت متخيل؟ لأ وتمرين ممل و مفيش اي موسيقى طالعة منه، قال إيه عشان يفك إيدي! ربنا يفك وسطك يا شيخ، روح الله يسامحك.
المهم، أنا عايز أختصر عليك كل المعاناة دي وأقولك من الآخر أسهل طريقة لتعلم العزف على الجيتار، عشان ربنا يباركلي في أولادي وعشان أول شهرين في التعليم دول أهم شهرين في الرحلة، لأنك لو شفت نتيجة مبكرة حتى لو عزفت Happy Birthday حتحس ان فيه أمل ، وانك ممكن تعزف الأغاني اللي نفسك فيها قدام شوية.
“الوصفة السحرية لأسهل طريقة لتعلم العزف على الجيتار”
أولأ: إنزل اشتري جيتار كلاسيك مش أكوستيك
حتشكرني لاحقاً عشان الجيتار الكلاسيك اوتاره ناعمة وسهلة ، الأكوستيك أوتاره ستيل وحتوجع صوابعك في الأول. حتى لو انت عايز تعزف روك او متال او بلوز، اتعلم على الجيتار الكلاسيك وبعدين عندك النت والفيسبوك ابقى بيع الجيتار القديم وهات واحد جديد. طب نوعه ايه؟ هات اللي تقدر عليه ميزانيتك دلوقتي، مش لازم ياماها ، فيه كورت و آش كويسين جداً وينفع تبدأ عليهم.
ثانياً: حدد انت عايز تعزف أي نوع موسيقى
أكيد فيه نوع موسيقى معين انت عايز تعزفه ونفسك تسمع الأغاني دي طالعة من الجيتار بتاعك، مش من الهيدفونز. فحدد انت عايز تعزف ايه بالضبط، او زي مين. بالنسبة للغربي في انواع كتيييير قوي، روك وبلوز وميتال وكلاسيك وجاز وبوب الخ.. بالنسبة للعربي مش حتفرق كتير لأن كلهم نفس الاستايل، بس برضه تكون محدد عربي او غربي.
ثالثاُ: إبحث عن مدرس جيتار
انا قلت قبل كده في مقال “محتاج ايه عشان تبدأ تعزف على الجيتار” ان ده أوبشن، بس لو بنتكلم على أسهل طريقة لتعلم العزف على الجيتار، يبقى لازم تاخد دروس مع مدرس جيتار. عشان لو مدرس شاطر حتقوله (أنا عايز أعزف كذا)، فبناءاً عليه حيختارلك أحسن منهج يوصلك للاستايل اللي انت عايز تعزفه. لكن مع الأسف ، فيه مدرسين مش بيهتموا بالنقطة دي وبيتعاملوا مع الطلبة على انهم في المدرسة، كل الطلبة تاخد نفس المنهج وغالباً بيبقى هوة اللي عامله ، مش منهج أكاديمي من مدرسة موسيقية معروفة. وان شاء الله أنا حتكتب مقال كامل عن ازاي تختار مدرس جيتار وايه الأسئلة اللي تسألها قبل ما تتفق معاه.
رابعاً: خصص وقت تتمرن فيه
زي ما قلت قبل كده ، تعامل مع الجيتار على انه فيفا او Assassin’s Creed – مش قلتلك لعيب بلاي ستيشن – اختار وقت تكون فيه مش تعبان ، ومش آخر اليوم وانت خلاص البطارية خلصت وتمسك الجيتار كأنك بتحل الواجب عشان المدرس حيشوفه بكرة! انت بتعمل حاجة المفروض انك بتحبها او عايز تبقى كويس فيها، فلازم تخصصلها وقت معين. ويفضل انك تعمل كورنر مخصوص للجيتار، فيه الجيتار و الكتب وحامل الموسيقى والكرسي ، كله جاهز مش لسة حتجيب الجيتار من تحت السرير او فوق الدولاب ، ولسة حتدور على الكتاب فين، كل ده حيخليك تكسل ، صدقني الحاجات الصغيرة دي بتفرق كتير قوي.
خامساً: ادي لنفسك فترة زمنية عشان تتعلم
يعني قول مثلاً ” أنا حتعلم جيتار في 6 شهور، ومش حبطل قبل كده”. بالطريقة دي انت برمجت العقل الباطن بتاعك انك حتحاول لمدة 6 شهور ، فمش حينفع انك تييجي بعد شهرين وتقول خلاص انا مش حكمل. حتحس ان فيه حاجة غلط، او ضميرك بيأنبك انك حتسيب الموضوع بالسرعة دي. وطبعاً خلال المدة دي لازم تكون بتعمل اللي قولنا عليه في النقط اللي فاتت، مش 6 شهور الجيتار بيلم تراب فوق الدولاب وانت فاكر كده انك بتتعلم! بلاش نضحك على بعض.
“الخلاصة”
اللي نفسه يعمل حاجة بيعملها ، لو عايز تتعلم جيتار حتلاقي 100 طريقة تعلمك، أنا في حد بيجيلي من مصر الجديدة وانا في المعادي، مهندس عمره 65 سنة وكان بيعزف في السبعينات زمان ودلوقتي عنده وقت وعايز يرجع يعزف تاني.
ولو مش عايز تعمل حاجة حتلاقي برضه 100 سبب يخليك ما تعملهاش. المشكلة مش في الجيتار، المشكلة فينا احنا، عايزين الحاجة السهلة اللي ماتخدش وقت ولا مجهود، مع اننا بنضيع كمية وقت في اي كلام يخلينا ناخد دكتوراة في الفيزياء النووية!
مستني ايه؟ انزل إشتري جيتار، ده ثمنه أرخص من أرخص موبايل في السوق، وأنا هنا حعلمك ازاي تعزف من الصفر حتى الإحتراف، وأنا واثق ان في موسيقار داخلك مستني الفرصة عشان يطلع بس انت اديله فرصته، هذا وبالله التوفيق.
