“أنا نفسي أتعلم جيتار بالعربي من زمان”

أول جملة بسمعها لما أتعرف بشخص جديد ويعرف إني بشتغل مدرس جيتار، وطبعاً برد عليه وأقوله”طيب ليه ما حاولتش تتعلم؟” وغالباً بيكون الرد انه مفيش منهج للجيتار بالعربي او انه مشغول يبحث، او واحد صاحبي حاول يتعلم جيتار ومعرفش وقاله انه صعب. في الموقع ده حتتعلم تعزف جيتار بالعربي من الصفر حتى الإحتراف.

 الحقيقة ان كل واحد فينا في وقت من الأوقات كان نفسه يتعلم جيتار، بالنسبة لي كانت وانا صغير وشفت دايسكي او دوق فليد في جريندايزر كل ما يكون مهموم يقعد تحت شجرة ويمسك الجيتار ويعزف، وفاكر اني قلت لوالدي أنا عايز أتعلم جيتار، بس ما حصلش اي حاجة. ومرة جاب جيتار لعبة ، أكيد كلنا عدى علينا الجيتار ده وأنا حاولت أعزف عليه وما وصلتش لأي حاجة.

بس أنا كنت سميع لكل حاجة فيها جيتار، ودايماً كان بيشد انتباهي اي تتر برنامج او كارتون فيه جيتار، بس ما كنتش عارف أبدأ منين، كنت مستني حد ييجي يقولي إتفضل الجيتار أهو، وانا حعلمك وحتعزف خلال شهر او اثنين بالكتير! وغالباً معظم الناس مستنية الشخص ده اللي عمره ما حييجي. وده مش في الجيتار بس على فكرة، شيل كلمة جيتار وحط مكانها أي حاجة تانية زي تنس، انجليزي، فوتوشوب، اللي انت عايزه. كلنا مستنيين حاجة او شخص ييجي ياخدنا من ايدينا ويعلمنا الحاجة اللي احنا نفسنا نتعلمها من زمان. حاجة كوميدية لكن للأسف معظمنا بيفكر بالشكل ده.

“أنا ماعنديش موهبة”

الموهبة ، أكتر حاجة موقفة الناس انها تتعلم. على فكرة ، انت مش حتعرف انت موهوب او لأ لغاية ما تتعلم وتجرب بنفسك. مافيش حد بيتولد بيعرف يعزف لوحده كده من غير أساسيات وتعليم، حتى موتزارت اللي هوة أكتر شخص موهوب في الكون أبوه علمه لحد ما اكتشف ان ابنه عنده موهبة.

إنت مش حتعرف انك موهوب غير لما تبدأ في العزف ، مش قبل ما تتعلم! فبلاش تحط لنفسك عوائق تمنعك انك تبدأ حاجة انت نفسك فيها. أنا معاك ان في ناس مالهاش في موضوع الموسيقى ده من أساسه، بس الناس دي ما خطرش في بالها انها تعزف أصلاً، فبلاش تقارن نفسك بالناس دي.

“أنا محتاج ايه عشان أتعلم جيتار من الصفر”

رقم 1: انت محتاج انك تشتري جيتار

ايوة حتشتري جيتار الأول عشان طول ما انت ما دفعتش فلوس في حاجة عمرك ما حتجربها. أول ما تدفع فلوس يبقى كده انت عملت استثمار في حاجة، وده حيديك حافز انك تبدأ. دي طبيعة بشرية، عارف لو الجيتار جالك هدية، برضه مش حتتعلم، حتفرح شوية بيه وتجرب اي هبل عليه، وبعدين حتركنه او حتعلقه في الحيطة ديكور. إنزل أشتري جيتار، أي جيتار يعجبك لونه وعلى قد ميزانيتك إشتريه. أتعلم عليه ، ولو بقيت تعزف ومستواك اتقدم حتكون بتفهم في الجيتارات وانواعها شوية ، ساعتها بيع الجيتار ده واشتري حاجة غالية تكمل بيها الرحلة.

“مشكلة اليوتيوب انه ملييييييان فيديوهات كتير تعلمك، بس مفيش منهج واضح”

رقم 2: انت محتاج منهج للمبتدئين

وده أهم من الجيتار اللي انت اشتريته. لو المنهج صعب ومعقد حتحس انك مش فاهم حاجة وفاشل، وحيبتدي الصوت اللي جواك يقولك مش قلتلك انك مش حتعرف تعزف، روح بيع الجيتار وهات الموبايل اللي نفسك فيه. مع أول عقبة حتواجهك حترمي الجيتار وتنسى انك نفسك من زمان تعزف، وكل ده سببه ايه؟ المنهج الغلط، عشان كده لازم تختار منهج صح من الأول عشان ما يحصلش ده. وهنا حتلاقي منهج تعليم جيتار بالعربي من البداية وحتى الإحتراف.

مشكلة اليوتيوب انه ملييييييان فيديوهات كتير تعلمك، بس مفيش منهج واضح ، كلها فيديوهات تعلمك أغاني وانت لسة ما تعرفش تمسك الجيتار او الريشة ازاي! ولا تعرف اسامي الكوردات او تنقل بينهم ازاي، فطبعاً النتيجة معروفة، حتبيع الجيتار وتشتري الموبايل!

رقم 3: محتاج مدرس شاطر

ده أوبشن لو تقدر تعمله يبقى وفرت على نفسك وقت ومجهود كبيير جداً، ليه؟ لأن المدرس الشاطر عارف المنهج الكويس اللي يبدأ معاك بيه، عشان انت حتقوله انت عايز تتعلم جيتار ليه، عايز تعزف أغاني عربي والا غربي، روك والا كلاسيك والا بوب، وبالتالي حيختار المنهج اللي يوصلك تعزف اللي انت عايزه في أقصر وقت ممكن. في أساسيات مهمة تمشي على اي ستايل موسيقى ، دي لازم تتعلمها زي ازاي تمسك الجيتار، اسماء الصوابع ، ازاي تضبط الأوتار، كل دي حاجات مشتركة  لازم تعرفها في الأول.

رقم 4: وقت تتمرن فيه

كان نفسي اقولك ان فيه حباية زي فيلم ماتريكس تاخدها حتبقى بتلعب جيتار، يمكن في المستقبل يعملوا حاجة زي كده، لكن حالياً الطريقة الوحيدة اللي حتخليك تعزف هية انك تمسك الجيتار لمدة 20 او 30 دقيقة على الأقل مرتين في الاسبوع، وتتمرن. وان شاء الله حكتب موضوع كامل عن التمرين وازاي تتمرن صح.

رقم 5: الصبر

مفتاح الفرج ومفتاح كل باب او طريق عايز تمشيه، لازم تصبر لأن كل حاجة حتقراها او حتتعلمها في الأول غالباً اول مرة تسمعها، فكل حاجة جديدة عليك في موضوع الجيتار والموسيقى، فحتاخد وقت عشان تتعلمها وايدك حتاخد وقت عشان تتأقلم على الأوتار والكوردات، وعلى حسب الوقت اللي مديه لنفسك عشان تتمرن، حتشوف بروجرس او تقدم بيحصل.

على سبيل المثال، ما ينفعش تكون بتتمرن 10 دقائق في الاسبوع ومتوقع تبقى جامد في شهرين، ده مش حيحصل، إنسى. لكن لو بتتمرن كل يوم ، وأنا أقصد كل يوم لمدة نص ساعة، فأنت كده بتعمل في اليوم اللي أخينا التاني بيعمله في 3 أسابيع! فطبعاً ممكن في شهرين تكون بتعزف أغاني انت عارفها. وصلت؟

“كل المناهج بالإنجليزي وانا عايز أتعلم جيتار بالعربي”

في دي انت معاك حق انك تقفل من الموضوع من الأول لو انت اللغة عندك ضعيفة شوية، ما هو ما ينفعش تكون بتتعلم حاجتين في نفس الوقت ، إنجليزي وجيتار! عشان كده انا عملت الموقع ده لأن حتلاقي فيه كل شرح الجيتار بالعربي، ايوة الكتب والفيديوهات أنا عملتها بالعربي عشان ما يكونش ليك حجة انك تتعلم، وعشان أنا عارف ان حاجز اللغة ده موقف ناس كتييير انها تبدأ.

“طيب عملت كل اللي فات، أعمل ايه دلوقتي؟”

إشتريت جيتار، وعندك منهج او رحت لمدرس واداني كتاب، وبتتمرن كل يوم او يومين، وعندي صبر. كده حضرتك انت من 5% من الناس اللي بتاخد أكشن وعايزة تعمل حاجة في حياتها. أنا بقالي أكتر من 15 سنة بعلم جيتار، وكل اللي أنا درستلهم وخدوا أكشن وعملوا الخطوات اللي فاتت دي قدروا انهم يعزفوا في مدة قصيرة لا تتجاوز الثلاث شهور!

خلي عندك ثقة في نفسك انك حتعرف تعزف ، وبلاش تقارن نفسك بأي عازف او صاحبك اللي بيلعب بقاله كذا سنة، فيه ناس خدت وقت قصير عشان تعزف، وفيه ناس خدت وقت أطول. ماليكش دعوة بأي حد، ركز في نفسك وإتمرن وإن شاء الله حتعزف حتى لو ابتديت من الصفر لأن كلنا ابتدينا منه، بالعكس أنا أبتديت من تحت الصفر كمان.

سنة 1992 ماكنش فيه أي حاجة، ولا انترنت ولا كتاب ولا مكان كويس أشتري منه جيتار أساساً! لما أفتكر البداية بتاعتي بقول سبحان من خلاني أكمل لدرجة انه يبقى شغلي الاساسي!

أتمنى اني أكون أفدتك وحمستك انك تبدأ تعزف الجيتار ، لو عندك اي سؤال او استفسار ياريت تكتبه وانا حرد عليك في أقرب فرصة. حتلاقي هنا كل اللي تحتاجه عشان تبدأ تعزف، كتب وفيديوهات وشرح جيتار بالعربي ، وفي قناتي على اليوتيوب موجود فيها الفيديوهات سلسلة الجيتار بالعربي للمبتدئين، ولو انت عازف متقدم او بتعرف تعزف برضه حتلاقي هنا حاجات تساعدك على انك تكون عازف محترف.